කටාන ප්‍රදේශයේ ඇඟලුම් කම්හලක් පවත්වාගෙන ගිය ඕමාන ජාතික ව්‍යාපාරිකයකුට අමානුෂික ලෙස පහරදී දේපොළ විනාශ කළ සිද්ධිය සම්බන්ධයෙන් හිටපු රාජ්‍ය ඇමැති ඉන්දික අනුරුද්ධ මහතාගේ බාල සොහොයුරු අපරාධ පරීක්ෂණ දෙපාර්තමේන්තුව (සී.අයි.ඩී.) මගින් පෙරේදා (01දා) රාත්‍රි අත්අඩංගුවට ගෙන තිබෙනවා.
පොලිසිය පවසන්නේ මෙම සිද්ධිය සම්බන්ධයෙන් හිටපු රාජ්‍ය ඇමැති ඉන්දික අනුරුද්ධ මහතාට ද චෝදනා එල්ල වී තිබෙන බවයි.
කටාන ප්‍රදේශයේ ඇඟලුම් කම්හලක් පවත්වාගෙන ගිය ධනවත් ව්‍යාපාරිකයකු වන ඕමාන් ජාතිකයා පදිංචිව සිටි නිවසට කඩාවැදී ඔහුට අමානුෂික ලෙස පහරදී දේපොළ විනාශ කර තිබුණේ ඉකුත් 2022 වර්ෂයේදීයි.
මෙම ව්‍යාපාරිකයාට අයත් ඇඟලුම් කම්හලේ ප්‍රවාහන කටයුතු සඳහා ලොරි රථ යෙදවීම සම්බන්ධයෙන් ඇතිවූ ආරවුලක් ප්‍රහාරයට හේතු වී තිබුණා.
මෙම සිද්ධිය සම්බන්ධයෙන් එවකට ජනාධිපති ගෝඨාභය රාජපක්ෂ මහතා ද මැදිහත්වී තිබූ අතර ජනාධිපතිවරයාගේ නියෝග මත ව්‍යාපාරිකයාට සහ ඇඟලුම් කම්හලට විශේෂ ආරක්ෂාවක් ද යොදවා තිබූ බවයි පැවසෙන්නේ.
මෙම ප්‍රහාරය සම්බන්ධයෙන් කඳාන පොලිසිය මගින් මීට ඉහතදී සැකකරුවන් සිව් දෙනකු අත්අඩංගුවට ගෙන තිබුණා. සිද්ධිය සම්බන්ධයෙන් විමර්ශන පැවැත්වීමෙන් පසුව අපරාධ පරීක්ෂණ දෙපාර්තමේන්තුව වෙත භාරදී තිබූ අතර එහිදී තවත් සැකකරුවන් දෙදෙනකු අත්අඩංගුවට ගෙන තිබෙනවා.
මෙම සිද්ධියට සම්බන්ධ ප්‍රධාන සැකකරුවකු වන හිටපු රාජ්‍ය ඇමැතිවරයාගේ සොහොයුරා අත්අඩංගුවට ගනු ලැබුවේ වසරකට පමණ පසුවයි.
අපරාධ පරීක්ෂණ දෙපාර්තමේන්තුව වැඩිදුර විමර්ශන පවත්වනවා.
