කොළඹ 7 මලලසේකර මාවතේ රජයේ මන්ත්‍රී නිල නිවසක ඇති වූ හදිසි ගින්න විනාඩි කිහිපයක් තුළදී නිවා දැමූ බව කුරුඳුවත්ත පොලිසිය පවසනවා.
මෙම දෙමහල් නිල නිවස මීට මාස අටකට පමණ ඉහතදී පාර්ලිමේන්තු මන්ත්‍රී නාමල් රාජපක්ෂ මහතා පදිංචිව සිට ඇති අතර ඉන් අනතුරුව විදුලිය විසන්ධි කර තිබූ බව පොලිසිය සඳහන් කරනවා.
දැනට හිටපු පාර්ලිමේන්තු මන්ත්‍රී ජානක වකුඹුර මහතා වෙත වෙන්කර ඇති රජයේ නිල නිවාසය අලුත්වැඩියා කටයුතු සිදු කරමින් සිටියදී, විදුලි බල මණ්ඩලය මගින් විසන්ධි කර තිබූ විදුලිය නැවත ලබාදී පිට වී යාමෙන් අනතුරුව විනාඩි 30 කට පමණ පසු නිවසේ උඩු මහලේ වායු සමීකරණ යන්ත්‍රයකින් මෙම ගින්න හටගෙන තිබූ බව පොලිස් විමර්ශනවලදී අනාවරණය වී තිබෙනවා.
එය ගිනි ගන්නා අයුරු නිවසේ පින්තාරු කටයුතු යෙදී සිටි පුද්ගලයෙකු දැක පොලිසිය දැනුවත් කිරීමෙන් අනතුරුව කොළඹ මහ නගර සභාවේ ගිනි නිවීමේ ඒකකයේ ගිනි නිවන රථ දෙකක් පැමිණ ගින්න සම්පූර්ණයෙන් නිවා දමා පාලනය කිරීමට කටයුතු කර තිබෙනවා.
ඇති වූ ගින්නෙන් වායු සමීකරණ යන්ත්‍රයේ අභ්‍යන්තරය සම්පූර්ණයෙන්ම විනාශ වී තිබූ බව පොලිසිය සඳහන් කරනවා.
ගින්නෙන් කිසිවකුටත් තුවාල සිදුවී නැති අතර වෙනත් දේපළ හානි කිසිවක් නැතැයි පොලිසිය පවසනවා.
