පාසලේ දී පහර දී අව්වේ දණ ගස්වා සිටියදී දැඩි ලෙස රෝගාතුරව මාස තුනක් තිස්සේ ප්රතිකාර ලබමින් සිටි අවුරුදු 16ක සිසුවියක මිය යෑමේ සිද්ධිය සම්බන්ධයෙන් වෙන්නප්පුව මාටින් ද පෝරස් විද්‍යාලයේ ගුරුවරියන් දෙදෙනෙකු අත්අඩංගුවට ගත් බව වෙන්නප්පුව මූලස්ථාන පොලිසීය සඳහන් කරනවා.
මෙසේ අත්අඩංගුවට ගෙන ඇත්තේ මාටින් ද පෝරස් මාවතේ පදිංචි පනස් හත් හැවිරිදි ගුරුවරියක හා ලුණුවිල කිරිමැටියාන ප්‍රදේශයේ 39 හැවිරිදි ගුරුවරියක්.
මෙසේ මියගොස් ඇත්තේ වෙන්නප්පුව එඩවට ජෝසප් මාවතේ කේ. එම්. රමේෂා දිනිති නමැති සිසුවියක්.
උතුරු කොළඹ රාගම ශික්ෂණ රෝහලේ ප්රතිකාර ලබමින් සිටියදී මෙම සිසුවිය මිය යාමෙන් පසු තොරතුරු වාර්තාවක් මාරවිල මහේස්ත්‍රාත් අධිකරණය හමුවට ඉදිරිපත් කර ලබාගත් අධිකරණ නියෝගයක් මත මෙම ගුරුවරියන් දෙදෙනා අත්අඩංගුවට ගත් බව වෙන්නපුව මූලස්ථාන පොලිසියේ නිලධාරියෙක් ප්‍රකාශ කළා.
පසුගිය අගෝස්තු නමවැනිදා මෙම සිසුවියට සහ තවත් සිසුවියකට විනය හේතූන් මතයැයි කියමින් අතින් පහර දීමක් කර පසුව පාසල් පිට්ටනියේ තණ කොළ ගැලවීමට සලස්වා අව්වේ දණ ගස්වා තිබූ බවට එම සිද්ධිය වූ වකවානුවේම පොලිසියට තොරතුරු ලැබී තිබිණියැයි පොලිසිය පවසනවා.
මෙම සිද්ධිය සම්බන්ධයෙන් එම වකවානුවේම මෙම ගුරුවරියෝ දෙදෙනා අත්අඩංගුවට ගෙන මහේස්ත්‍රාත් අධිකරණය හමුවට ඉදිරිපත් කිරීමෙන් පසු රිමාන්ඩ් භාරයට පත් කර පසුව ශරීර ඇප මත මුදා හැර තිබෙනවා.
මාස තුනක් තිස්සේ රෝහල්ගතව ප්රතිකාර ලැබූ මෙම සිසුවිය මිය යන තෙක්ම සිහිසුන්ව සිටි නිසා ඇයගෙන් ප්‍රකාශයක් ද ලබා ගැනීමට නොහැකි වූ බව ද පොලිසිය සඳහන් කරනවා.
