තොරතුරු තාක්ෂණ සේවා සපයන්නන් සඳහා මෙම වසරේ දී අලුතින් හඳුන්වා දෙන සියයට පහළොවක බද්දෙන් රුපියල් කෝටි එක්දහස් තුන්සියයක ආදායමක් අපේක්ෂා කරන බව මුදල් අමාත්‍යාංශ නිලධාරීන් මුදල් කාරක සභාව දැනුවත් කර තිබෙනවා.
එය දළ ජාතික නිෂ්පදිතයෙන් සියයට 0.04ක් පමණ වන බවයි පැවසෙන්නේ.
පසුගිය ආණ්ඩුව ජාත්‍යන්තර මූල්‍ය අරමුදල සමග සාකච්ඡා කර තිබුණේ මෙම බද්ද සියයට තිහක් කිරීමටයි. එහෙත් වත්මන් රජය මූල්‍ය අරමුදල සමග කළ සාකච්ඡා මත බද්ද සියයට පහළොව දක්වා අඩුකර ගැනීමට හැකි වූ බව මෙම කාරක සභාවට එක්වූ ආර්ථික සංවර්ධන නියෝජ්‍ය ඇමැති ආචාර්ය හර්ෂණ සූරියප්පෙරුම එම කාරක සභාවේ දී සඳහන් කළා.
මෙම බද්ද හේතුවෙන් තොරතුරු තාක්ෂණ සේවා සපයන්නන් අධෛර්යමත් වන බවට පසුගිය කාලය පුරාම චෝදනා එල්ල වුණා. එම ප්‍රශ්නයට පිළිතුරු දෙමින් කම්කරු ඇමති හා ආර්ථික සංවර්ධන නියෝජ්‍ය ඇමැති මහාචාර්ය අනිල් ජයන්ත ප්‍රකාශ කළේ මෙරට වෙසෙන්නන් සියලු දෙනා බදු ගෙවීමට යටත් වන බවයි.
