පයාගල පොලීසියේ රථවාහන අංශ නිලධාරීන් අමානුෂික ලෙස පහරදුන් බව පවසමින් 16 හැවිරිදි පාසල් සිසුවෙකු රෝහල්ගත තිබෙනවා.
මෙලෙස රෝහල්ගත කර ඇත්තේ පයාගල මලේගොඩ ප්‍රදේශයේ පදිංචි තරුෂ ජිනාල් නමැති පාසල් සිසුවෙක් බව පොලීසිය සඳහන් කරනවා.
රෝහල්ගත කර ඇති සිසුවා මිතුරෙකු සමග ඊයේ (07) පස්වරුවේ පියාට අයත් යතුරුපැදියෙන් අසල ඇති වෙළෙඳසැලකට ගොස් ඇති අතර එහිදී මිතුරා ආරක්ෂිත හිස්වැසුමක් පැළඳ නොසිටි බව වාර්තා වනවා.
ඒ බව දුටු පයාගල පොලීසියේ රථවාහන අංශයේ ජංගම රාජකාරීවල නිරතවී සිටි නිලධාරින් දෙදෙනකු ඔවුන් පසුපස හඹා ගොස් යතුරුපැදිය නතර කර බැනවැදී තිබෙනවා.
ඉන් බියට පත්වී ඇති පාසල් සිසුවා යතුරුපැදිය ක්‍රියාත්මක කර අසල ඥාති නිවසක් කරා එය ධාවනය කර ඇති අතර ඒ අනුව නැවත ඔවුන් ලුහුබැඳ පැමිණි පොලිස් නිලධාරීන් යතුරුපැදියේ පසුපැදිකරු ලෙස සිටි සිසුවාට පහරක් එල්ලකර තිබෙනවා.
පසුව යතුරුපැදිය ධාවනය කළ සිසුවාට කිහිප වරක් පහරදී ඇති බවද පැවසෙනවා. පහරකෑමෙන් බිම ඇදවැටී ඇති සිසුවාව මෙලෙස රෝහල්ගත කර ඇති බවයි වාර්තා වන්නේ.
අදාළ සිසුවා ප්‍රකාශ කර ඇත්තේ බිම ඇද වැටුණු පසු පොලිස් නිලධාරියෙක් තමාගේ කොන්ද ප්‍රදේශය පෑගූ බවයි.
පහරකෑමට ලක්වූ පාසල් සිසුවා කළුතර නාගොඩ ශික්ෂණ රෝහලට ඇතුළත් කෙරුණු අතර ඔහු 5 වන වාට්ටුවේ නේවාසිකව ප්‍රතිකාර ලබමින් සිටින බව වාර්තා වනවා.
සිද්ධිය සම්බන්ධයෙන් පහරකෑ සිසුවාගේ පියා වන ඩබ්ලිව් .ඒ. අසංක විසින් මේ සම්බන්ධයෙන් කළුතර ජ්‍යේෂ්ඨ පොලිස් අධිකාරි කාර්යාලය වෙත පැමිණිල්ලක් ඉදිරිපත් කර තිබෙනවා.
ඔහු පවසන්නේ තමාගේ පුතාට මෙන් තවත් දරුවෙකුට මෙවන් අමානුෂික පහරදීමක් සිදුනොකිරීමට කටයුතු කරන ලෙස බලධාරීන්ගෙන් ඉල්ලා සිටින බවයි.
සිද්ධියට සම්බන්ධ පොලිස් සැරයන්වරයාට මේ වනවිට ස්ථාන මාරුවක් ලබාදී ඇති බවද වැඩිදුර විමර්ශන ක්‍රියාත්මක බවද පොලීසියේ උසස් නිලධාරියෙකු සඳහන් කර තිබෙනවා.
