ඉදිරි මහ මැතිවරණයක දී දෙමළ සහ මුස්ලිම් පක්ෂ එක්ව නව සන්ධානයක් ගොඩ නැගීම සම්බන්ධයෙන් සාකච්ඡා ආරම්භ කර තිබෙනවා.
ඒ අනුව අදාළ සාකච්ඡාවල දෙවන අදියරේ සාකච්ඡා අද (28) දිනයේ පැවැත්වීමට නියමිතව තිබෙනවා.
දෙමළ ප්‍රගතිශීලී සන්ධානයේ නායක මනෝ ගනේෂන්, ශ්‍රී ලංකා මුස්ලිම් කොංග්‍රසයේ නායක රවුෆ් හකීම් සහ දෙමළ ජාතික සන්ධානය නියෝජනය කරමින් එම්.ඒ සුමන්තිරන් යන හිටපු මන්ත්‍රීවරුන් අතර මෙම සාකච්ඡාව පැවැත්වෙනු ඇති.
මෙහි පළමු වටයේ සාකච්ඡා පසුගිය සතියේ පැවති අතර එහිදී ඉදිරි මැතිවරණවල දී දෙමළ මුස්ලිම් පක්ෂ එක්ව තරග කිරීම සම්බන්ධයෙන් අවධානය යොමුව තිබුණා.
කෙසේ වෙතත් මෙහිදී නව සන්ධානයක් බිහි කිරීම පිළිබඳ අවසන් එකඟතාවයකට පැමිණ නොමැති බවද වාර්තා වුණා.
මේ වන විටත් ශ්‍රී ලංකා මුස්ලිම් කොංග්‍රසය සහ දෙමළ ප්‍රගතිශීලී සන්ධානය සමගි ජන බලවේගය පක්ෂයේ හවුල්කරුවන් වන අතර දෙමළ ජාතික සන්ධානය ද ඊට එක්කර ගැනීම පිළිබදව ද එහිදී අදහස් පළ ව තිබෙනවා.
කෙසේ වෙතත් පසුගිය දා පැවති ජනාධිපතිවරණයේ දී දෙමළ ජාතික සන්ධානයේ සහාය සමගි ජන බලවේගයේ ජනාධිපති ධුර අපේක්ෂක විපක්ෂ නායක සජිත් ප්‍රේමදාස මහතාට හිමිවුණා.
මෙවැනි තත්ත්වයක් තුළ විපක්ෂයේ දේශපාලන පක්ෂ ඒකාබද්ධව තරග කළහොත් පාර්ලිමේන්තුවේ මන්ත්‍රී ආසන විශාල සංඛ්‍යාවක් ඔවුන්ට හිමිකර ගත හැකි බව මෙම පක්ෂ වල මතය වී තිබෙනවා.
