ජනාධිපතිවරණයට ඉදිරිපත් වූ අපේක්ෂකයින් 30 දෙනෙකු මේ වන විට සිය වියදම් වාර්තා මැතිවරණ කොමිෂන් සභාව වෙත භාරදී තිබෙනවා.
එහි ප්‍රකාශකයෙකු පැවසුවේ අද (13) පස්වරුව වන විට එම අපේක්ෂකයින් අදාළ වාර්තා භාරදී තිබූ බවයි.
ජනාධිපතිවරණයට ඉදිරිපත් වූ අපේක්ෂකයින්ගේ වියදම් වාර්තා ලබාදීමට ඇති කාලය අද මධ්‍යම රාත්‍රී 12න් අවසන් වෙනවා.
එම කාලය තුළ අදාළ වාර්තා ලබා නොදෙන අපේක්ෂයින්ට එරෙහිව නීතිමය පියවර ගන්නා බව මැතිවරණ කොමිෂන් සභාව සඳහන් කළා.
ඒ අනුව අද පස්වරුව වන විටත් අපේක්ෂකයින් සහ දේශපාලන පක්ෂ සිය වියදම් වාර්තා ලබාදීමට මැතිවරණ කොමිෂන් සභාව වෙත පැමිණ සිටි බව වාර්තා වුණා.
ජනාධිපතිවරණයට ඉදිරිපත් වූ දේශපාලන පක්ෂ හා ස්වාධීන කණ්ඩායම් 24ක් ද සිය වියදම් වාර්තා ලබාදී ඇති බව මැතිවරණ කොමිෂන් සභාව ප්‍රකාශ කළා.
මේ අතර ඇල්පිටිය ප්‍රාදේශීය සභා ඡන්ද විමසීමට අදාළ තැපැල් ඡන්ද සලකුණු කිරීමේ කටයුතු හෙට (14) දිනයේ සිදුකිරීමට නියමිතව තිබෙනවා.
හෙට දිනයේ තැපැල් ඡන්ද සලකුණු කිරීමට නොහැකි වන ඡන්දදායකයින් සඳහා ලබන 18 වන දින ඒ සඳහා අවස්ථාව හිමිවන බව මැතිවරණ කොමිෂන් සභාව සඳහන් කළා.
ඇල්පිටිය ප්‍රාදේශීය සභා ඡන්ද විමසීම ඔක්තෝබර් 26 වනදා පැවැත්වීමට නියමිතයි.
