2034 වසරේ සවුදි අරාබියේදී පැවැත්වීමට නියමිත FIFA පාපන්දු ලෝක කුසලාන තරගාවලිය වෙනුවෙන් සවුදි අරාබියේ ඉදිකිරීමට නියමිත නව පාපන්දු ක්‍රීඩාංගණයේ සැලැස්ම ඊයේ පළමුවරට මාධ්‍යට නිකුත් කළා.
මෙම ක්‍රීඩාංගණය 2029 වසරේදී ඉදිකර අවසන් කිරීමට නියමිතයි.
2034 වසරේදී පැවැත්වීමට නියමිත පාපන්දු ලෝක කුසලානය වෙනුවෙන් සත්කාරකත්වය ලබාදීමට නිතරගයෙන් තේරී පත්වී ඇත්තේ සවුදි අරාබියයි.
ඒ සත්කාරක රට තෝරාගැනීම වෙනුවෙන් 2023 අවසානයේ නියමිත කාලසීමාවට පෙර විධිමත් ලෙස ලංසුවක් ඉදිරිපත් කළ එකම රට සවුදි අරාබිය වීම නිසායි.
තරගාවලිය පැවැත්වෙන දින තවමත් තීරණය කර නොමැති අතර 2034 පාපන්දු ලෝක කුසලානයට කණ්ඩායම් 48ක් එක්වීමට නියමිත බව වාර්තා වනවා.
සවුදි අරාබියේ නගර 15ක් කේන්ද්‍ර කරගනිමින් 2034 ෆිෆා පාපන්දු ලෝක කුසලානය පැවැත්වීමට සැලසුම් කර තිබෙනවා.
මෙම පාපන්දු ලෝක කුසලානය ඉලක්ක කරගනිමින් සවුදි අරාබියේ රියාද් නගරයේ නව ක්‍රීඩාංගණයක් ඉදි කිරීමට එරට රජය තීරණය කර ඇති අතර ඒ අනුව එම ක්‍රීඩාංගණයේ සැලැස්ම පිළිබඳ විඩියෝවක් ඊයේ මාධ්‍යට නිකුත් කෙරුණා.
ප්‍රේක්ෂකයන් අනූ දෙදහකට අසුන්ගත හැකි ආකාරයට මෙම ක්‍රීඩාංගණය ඉදිවීමට නියමිතයි.
මෙම ක්‍රීඩාංගනයේ ගෘහස්ථ ක්‍රීඩාංගණයක්, ඔලිම්පික් ප්‍රමාණයේ පිහිනුම් තටාකයක් සහ යාබද සශ්‍රීක භූ දර්ශනය සමඟ මිශ්‍ර කරමින් මෙම ක්‍රීඩා සංකීර්ණය සැලසුම් කර තිබෙනවා.
