සංවිධානාත්මක අපරාධකරුවකු වන කංජිපානි ඉම්රාන් අත්අඩංගුවට ගැනීම සඳහා දැනටමත් ඉන්ටර්පෝල් සහාය ලබාගෙන ඇති බව පොලිසිය පවසනවා.
පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව ප්‍රකාශ කර ඇත්තේ දැනටමත් ඔහුට ඉන්ටර්පෝල් රතු නිවේදන නිකුත් කර ඇති බවයි.
එහෙත් ඔහු පිටුවහල් කර ගැනීම පහසු කර ගැනීමට ඔහු දැනට පදිංචිව සිටින රටේ සහයෝගය අවශ්‍ය බව ඔහු කියා සිටියා.
ක්ලබ් වසන්ත නමින් හඳුන්වන ව්‍යාපාරික සුරේන්ද්‍ර වසන්ත පෙරේරා ඇතුළු දෙදෙනකුට මරු කැඳවමින් අතුරුගිරියේ පසුගියදා සිදුවූ වෙඩි තැබීම කංජිපානි ඉම්රාන්ගේ මෙහෙයවීමෙන් සිදු වූවක් බවට සැක පළවීමත් සමග ඔහු පිළිබඳ යළිත් කතාබහට ලක්ව තිබෙනවා.
කංජිපානි ඉම්රාන් 2015 මාර්තු 28 වැනි දින ව්‍යාජ විදේශ ගමන් බලපත්‍රයක් භාවිත කරමින් එක්සත් අරාබි එමීර් රාජ්‍යයේ ඩුබායි වෙත පළාගොස් තිබුණා.
මියගිය සංවිධානාත්මක අපරාධ කල්ලි නායක මාකඳුරේ මධුෂ් සහ තවත් කිහිප දෙනෙකු සමඟ 2019 පෙබරවාරි 5 වැනි දින ඩුබායි හෝටලයක පැවති සාදයකදී අත්අඩංගුවට ගන්නා තෙක් ඔහු ඩුබායි හි ජීවත් වූ අතර ශ්‍රී ලංකාවට පිටුවහල් කළ ඔහු මාලදිවයිනට පළා යෑමට උත්සාහ කිරීමේදී කටුනායකදී අත්අඩංගුවට ගෙන තිබුණා.
2019 අගෝස්තු 23 දින කොළඹ මහාධිකරණය කංජිපානි ඉම්රාන්ට මත්ද්‍රව්‍ය සන්තකයේ තබා ගැනීම සහ ජාවාරම් කිරීම සම්බන්ධයෙන් වරද පිළිගැනීමෙන් පසු වසර හයක බරපතළ වැඩ සහිත සිර දඬුවමක් නියම කළේ එක් චෝදනාවකට වසර තුන බැගින්.
2022 දී, ඔහු පොලිස් නිලධාරියකුට මරණ තර්ජන එල්ල කිරීමේ නඩුවකට ඇප මත නිදහස් වූ අතර, පසුව ඔහු ඉන්දියාවට පළා ගොස් එතැන් සිට ප්‍රංශයට පළා ගිය බව පැවසෙනවා.
