පසුගිය රජයේ මතභේදාත්මක විදුලි වාහන ආනයන යෝජනා ක්‍රමය යටතේ නිකුත් කරන ලද බලපත්‍රවලින් සියයට 64ක් සංක්‍රමණික සේවකයන් සඳහා පහසුකම් සැපයීම වෙනුවෙන් ලියාපදිංචි වී ඇති ආයතන 31න් දෙකකට පමණක් ලබා දී ඇති බව ජාතික විගණන කාර්යාලය සොයා ගෙන තිබෙනවා.
විදේශ රැකියාවල සිටින ශ්‍රී ලාංකිකයන් සඳහා ඔවුන්ගේ විදේශ ප්‍රේෂණ මත පදනම්ව වාහන ආනයන බලපත්‍ර නිකුත් කිරීමට විදේශ රැකියා අමාත්‍යාංශයේ මුලපිරීම පිළිබඳ ජාතික විගණන කාර්යාලය විසින් කළ විශේෂ විගණනය දැන් මහජනතාවට නිකුත් කර ඇති බවයි වාර්තා වන්නේ.
Auto Capital Investment (Pvt) Ltd බලපත්‍ර 335ක් සඳහාත් Overland Auto Mobile බලපත්‍ර 305ක් සඳහාත් ලෙස බලපත්‍රලාභීන් 640ක් සඳහා පහසුකම් සපයා ඇති බව එහි සඳහන් වනවා.
ඒ අනුව සමාගම් දෙකම මුළු බලපත්‍ර සංඛ්‍යාවෙන් සියයට 64ක් ලබා දී තිබෙනවා.
මෙම වාර්තාව මගින් ප්‍රශ්නකාරී අවස්ථා විශාල ප්‍රමාණයක් හෙළිදරව් කරන අතර, ඒවායින් සමහරක් දැනටමත් පාර්ලිමේන්තුව හරහා ද ප්‍රචාරය කර තිබෙනවා.
විදේශ රැකියා අමාත්‍යාංශය විසින් නිකුත් කර ඇති බලපත්‍ර භාවිත කරමින් බලපත්‍රලාභීන් 510 දෙනෙකු මේ වසරේ ජුනි 30 වැනිදා වන විට විදුලි වාහන ආනයනය කර ඇති බව එහි සඳහන් වනවා.
නමුත් ජූලි 9 වැනිදා වන විට ඔවුන්ගෙන් මෝටර් රථ ප්‍රවාහන දෙපාර්තමේන්තුවේ ලියාපදිංචි වී ඇත්තේ 375ක් පමණයි.
ඉන් පවා වාහන 84ක් බලපත්‍රලාභීන් විසින් තුන්වැනි පාර්ශවයකට ලබා දී තිබෙනවා.
මෙම පහසුකම භාවිත කළ සංක්‍රමණික ශ්‍රමිකයන්ගේ කාණ්ඩවල යටතේ විදේශ රැකියා අමාත්‍යාංශයේ ලිපිගොනුවල තොරතුරුවලට අනුව, විශාල සංඛ්‍යාවක් (පුද්ගලයන් 164) නාවිකයන් වූ අතර පසුව ‘කළමනාකරුවන්’ (150) සහ ‘අධ්‍යක්ෂකවරුන්’ (96) වුණා.
මීට අමතරව, ඉංජිනේරුවන් 78 ක්, ‘නිලධාරීන්’ 61 ක් සහ ‘උපදේශකයන්’ 24ක් ද සිටිනවා.
එක් අන්තර්ජාතික ක්‍රිකට් විනිසුරුවරයෙක් සහ වෛද්‍යවරු තිදෙනෙක් ද ඒ අතර සිටිනවා.
මෙම යෝජනා ක්‍රමයෙන් ප්‍රයෝජන ගැනීමට අවශ්‍ය සෑම ශ්‍රී ලාංකික සංක්‍රමණිකයකුම ශ්‍රී ලංකා විදේශ සේවා නියුක්ති කාර්යාංශයේ ලියාපදිංචි වී තිබිය යුතු බවට නියම කර තිබුණද, බලපත්‍රලාභීන් 1,000න් 286ක් පමණක් එනම් සියයට 28.6ක් වැනි සුළු පිරිසක් පමණක් ලියාපදිංචි වී ඇති අය බව හෙළිව තිබෙනවා.
