ඖෂධ අලෙවිසැල් පවත්වාගෙන යෑම සඳහා සුදුසුකම් ලත් ඖෂධවේදියකු පූර්ණ කාලීනව සිටීම ජාතික ඖෂධ නියාමන අධිකාරිය විසින් අනිවාර්ය කිරීම හේතුවෙන් දිවයින පුරා ඔසුසල් වැසී යෑමේ දැඩි අවදානමකට මුහුණ දී තිබෙනවා.
කෙසේවෙතත්, සමස්ත ලංකා පෞද්ගලික ඔසුසල් හිමියන්ගේ සංගමය කියා සිටින්නේ පසුගිය මාස කිහිපය තුළ මෙම බරපතළ කාරණය සම්බන්ධයෙන් සාකච්ඡා කිරීමට ඇමැතිවරයා සම්බන්ධ කර ගැනීමට ගත් උත්සාහයන්ට සෞඛ්‍ය අමාත්‍යාංශය තවමත් ප්‍රතිචාරයක් දක්වා නොමැති බවයි.
මෙම තත්ත්වය ජනවාරි 1 වැනිදා සිට තවත් නරක අතට හැරෙනු ඇති බව සමස්ත ලංකා පෞද්ගලික ඔසුසල් හිමියන්ගේ සංගමයේ සභාපති චන්දික ගන්කන්ද ප්‍රකාශ කරනවා.
“අපි අදාළ ආයතන කිහිපයක් සමඟ මෙම තත්ත්වය සාකච්ඡා කිරීම සඳහා රැස්වීමක් ඉල්ලා සිටියා, නමුත් අපට තවමත් ප්‍රතිචාරයක් ලැබී නැහැ” යනුවෙන් ඔහු සඳහන් කර තිබෙනවා.
පවතින තත්ත්වයෙහි බරපතළකම සහ රටට ඇතිවන අහිතකර බලපෑම පිළිබඳ අවධාරණය කළ ගන්කන්ද, ඔසුසල් පවත්වාගෙන යෑමේ ගැටලුව හේතුවෙන් සාමාන්‍ය ජනතාව, විශේෂයෙන් ග්‍රාමීය ප්‍රදේශවල රෝගීන් මුහුණ දෙන දුෂ්කරතා ගැන සඳහන් කරනවා.
“ගම් ප්‍රදේශවල ඔසුසල් වැසීම නිසා එම ප්‍රදේශවල සෞඛ්‍යයට බාධාවක්. ඖෂධ ලබා ගැනීම සඳහා කොළඹ වැනි ප්‍රදේශවලට යෑමට මිනිසුන්ට සිදුවී තිබෙනවා,” යැයි ඔහු ප්‍රකාශ කර සිටියා.
“කිසිදු පියවරක් නොගතහොත් මෙම ගැටලු තවදුරටත් නරක අතට හැරෙනු ඇත.”යනුවෙන් ඔහු සඳහන් කරනවා.
ඔවුන්ගේ ඉල්ලීම වූයේ ලියාපදිංචි ක්‍රමය බිඳ දැමීම නොව සුදුසුකම් ලත් ඖෂධවේදීන්ගේ හිඟය පියවීම බව ගන්කන්ද අවධාරණය කරනවා.
දැනට දිවයින පුරා ක්‍රියාත්මක වන ඔසුසල් 5,100න් සුදුසුකම් ලත් ඖෂධවේදීන්ගේ හිඟය හේතුවෙන් බොහෝ ඔසුසල් වැසීයෑමට මුහුණ පා තිබෙනවා.
ශ්‍රී ලංකාව බුද්ධි ගලනයකට මුහුණ දෙමින් සිටින අතර එහිදී සුදුසුකම් ලත් වෘත්තිකයන් වඩා හොඳ අවස්ථා සොයමින් සංක්‍රමණය වනවා.
ගන්කන්දට අනුව සුදුසුකම් ලත් පුද්ගලයන් ඉවත්ව යන විට මෙරට ඖෂධවේදීන්ගේ සංඛ්‍යාව අඩුවෙමින් තිබෙනවා.
නොවැම්බර් මාසය වන විට, ශ්‍රී ලංකා වෛද්‍ය සභාව (SLMC) විසින් නැවත ලියාපදිංචි කිරීමේදී අනාවරණ වූයේ දැනට දිවයින පුරා ක්‍රියාත්මක වන්නේ ඖෂධවේදීන් 6,700ක් පමණක් බවයි.
ජාතික ඖෂධ නියාමන අධිකාරී පනතට අනුව, ඖෂධ, වෛද්‍ය උපකරණ හෝ මායිම් නිෂ්පාදන බෙදා හැරීම ඖෂධවේදියකු හෝ ලියාපදිංචි ආධුනික ඖෂධවේදියකු විසින් ඖෂධවේදියකුගේ සෘජු අධීක්ෂණය යටතේ සිදු කළ යුතුය.
ගන්කන්ද ප්‍රකාශ කළේ සුදුසුකම් ලත් ඖෂධවේදීන් බඳවා ගැනීමේ ජාතික ඖෂධ නියාමන අධිකාරියේ අපේක්ෂාව සාධාරණ වුවත් වත්මන් තත්ත්වය යටතේ එය කළ නොහැකි බවයි.
ශ්‍රී ලංකා වෛද්‍ය විද්‍යාල කවුන්සිලය විසින් නිකුත් කරන ලද ඖෂධවේදියකු ලෙස ප්‍රවීණතා සහතිකයක් අවශ්‍ය බව ඖෂධවේදීන් සඳහා වන ශ්‍රී ලංකා වෛද්‍ය සභා අයදුම්පතෙහි සඳහන් වනවා.
කෙසේවෙතත්, ඖෂධවේදීන් සඳහා වන රජයේ විභාගයෙන් සමත් වන්නේ අපේක්ෂකයන්ගෙන් 5%ක් පමණයි.
සෞඛ්‍ය අමාත්‍යාංශයේ ලේකම් වෛද්‍ය අනිල් ජාසිංහ අවධාරණය කරන්නේ ඔසුසල් හිමියන් මේ සම්බන්ධයෙන් පළමුව ජාතික ඖෂධ නියාමන අධිකාරිය සමඟ සාකච්ඡා කළ යුතු බවයි.
කෙසේවෙතත්, සෞඛ්‍ය ඇමැති වෛද්‍ය නලින්ද ජයතිස්සගේ සම්බන්ධීකාරකයකු සඳහන් කර ඇත්තේ ජනවාරි මස මුල් සතියේ ඔසුසල් හිමියන් හමුවීමට ඇමැතිවරයා සැලසුම් කර ඇති බවයි.
කෙසේවෙතත්, මෙම රැස්වීම පිළිබඳ ෆාමසි හිමියන්ට දැනුම් දී නැහැ.
වෛද්‍ය ජාසිංහ ද මෙම හමුව පිළිබඳ නොදන්නා බව ප්‍රකාශ කර තිබෙනවා.
මේ අතර ජාතික ඖෂධ නියාමන අධිකාරියේ සභාපති වෛද්‍ය ආනන්ද විජේවික්‍රම පැහැදිලි කළේ ඖෂධවේදීන් පුහුණු කිරීමේ වගකීම ජාතික ඖෂධ නියාමන අධිකාරියට නොමැති බවයි.
සුදුසුකම් ලත් ඖෂධවේදීන් නොමැතිව ඔසුසල් ලියාපදිංචි කළ යුතු දැයි ඔහු ප්‍රශ්න කරනවා.
වෛද්‍ය විජේවික්‍රම යෝජනා කළේ, ඇතැම් අවස්ථාවල ඖෂධවේදීන් ප්‍රමාණවත් වැටුප් නොලැබීම හේතුවෙන් ඔසුසල්වල සේවය නොකරන බව නව ඔසුසල් පිහිටුවීම සඳහා නිතර ලැබෙන ඉල්ලුම් පත්‍ර මගින් පැහැදිලි වන බවයි.
ප්‍රමිතීන් පවත්වා ගෙන යෑමට සහ මහජන ආරක්ෂාව සහතික කිරීම සඳහා ඔසුසල්වල සුදුසුකම් ලත් වෘත්තිකයන්ගෙන් කාර්ය මණ්ඩලයක් සිටීම සහතික කිරීමේ වැදගත්කම ද ඔහු අවධාරණය කරනවා.
මේ අතර, ශ්‍රී ලංකාවේ ඖෂධ මිල නියාමනය කිරීමට දරන උත්සාහයට බාධාවක් වන නීතිමය අභියෝග විසඳීම සඳහා ජාතික ඖෂධ නියාමන අධිකාරිය නීතිපතිවරයාගෙන් උපදෙස් ලබා ගනිමින් සිටිනවා.
නියාමන ක්‍රියාවලියේදී ප්‍රමාණවත් උපදේශන නොලැබීම ගැන ඖෂධ ආනයනකරුවන් සහ නිෂ්පාදකයන්ගේ නීතිමය ක්‍රියාමාර්ග හේතුවෙන් උසාවි වාරණ නියෝගයක් මගින් මිල සීමාවන් බලාත්මක කිරීමට ජාතික ඖෂධ නියාමන අධිකාරිය දරන උත්සාහය අවහිර කර තිබෙනවා.
