මත්ද්‍රව්‍ය සහ සංවිධානාත්මක අපරාධ කල්ලි නායකයකු බව කියන ගනේමුල්ල සංජීව නැමැත්තා ඝාතන සිද්ධිය සම්බන්ධයෙන් සැඟවී සිටින සැකකාරිය සොයා පොලිසියේ 100 ට අධික නිලධාරීන් පිරිසක් මතුගම, අගලවත්ත, හොරවල, යටදොළ, නෑබඩ, වෑත්තෑව ඇතුළු ප්‍රදේශ කීපයක සෝදිසි මෙහෙයුම් ක්‍රියාත්මක කර තිබෙනවා.
ඒ අනුව කොළඹ අපරාධ කොට්ඨාසය, පොලිස් විශේෂ කාර්ය බළකාය, බුද්ධි නිලධාරීන්, පොලිස් මහජන ආරක්ෂණ කළමණාකරන නිලධාරීන් ඇතුළු පිරිසක් මෙම මෙහෙයුම් ක්‍රියාත්මක කරනවා.
පොලිසිය මෙතෙක් සිදුකළ විමර්ශනවලදී සැකකාරිය මතුගම ප්‍රදේශයට අවසන්වරට පැමිණ තිබූ බවට බුද්ධි තොරතුරු අනුව අනාවණය වී තිබුණා.
එමෙන්ම එම සැකකාරියගේ නවතම ඡායාරූප කීපයක් ද පොලිස් විමර්ශනවලින් අනාවරණය කරගෙන තිබූ අතර එම ඡායාරූප ද මාධ්‍ය වෙත යොමුකර තිබෙනවා.
කෙසේවෙතත් සැකකාරිය පිළිබදව නිවැරැදි තොරතුරක් ලබාදෙන අයකුට පොලිස් ත්‍යාග අරමුදලෙන් වටිනා මුදල් ත්‍යාගයක් ලබා දෙන බවද ඉකුත් දා වැඩබලන පොලිස්පති ප්‍රියන්ත වීරසූරිය මහතා මාධ්‍ය හමුවකදී කියා සිටියා.
තොරතුරු ලබාදෙන පුද්ගලයන්ගේ රහස්‍යභාවය ආරක්ෂා කරන බවද පොලිසිය කියා සිටියා.
ඇය පිළිබදව තොරතුරක් ඇත්නම් කොළඹ අපරාධ කොට්ඨාසයේ අධ්‍යක්ෂ 0718591727 සහ ස්ථානාධිපති 0718591735 යන දුරකතන අංකවලට අමතන ලෙස පොලිසිය ඉල්ලා සිටියා.
ගනේමුල්ල සංජීව නැමැත්තා ඝාතනය කිරීමේ සිද්ධිය සම්බන්ධයෙන් මේවන විට සැකකරුවන් 8 දෙනකු අත්අඩංගුවට ගෙන ඇති අතර පොලිස් කොස්තාපල්වරු දෙදෙනෙක්ද ඒ අතර වනවා.
එම ඝාතන සිද්ධිය සම්බන්ධයෙන් කොළඹ අපරාධ කොට්ඨාසය වැඩිදුර විමර්ශන සිදුකරනවා.
