නුවරඑළිය ප්‍රදේශයේදී පාසල් සිසුන් පිරිසක් බලහත්කාරයෙන් බස් රථයෙන් බැසීමට සැලැස්වූ ශ්‍රී ලංකා ගමනාගමන මණ්ඩලයේ බස් කොන්දොස්තරවරයකුට එරෙහිව විනය ක්‍රියාමාර්ග ආරම්භ කර තිබෙනවා.
සමාජ මාධ්‍යවල සංසරණය වූ සිද්ධියේ වීඩියෝ දර්ශනවලින් පෙනීයන්නේ, කොන්දොස්තරවරයා රළු ලෙස හැසිරෙන ආකාරය සහ වාර ප්‍රවේශපත්‍ර තිබූ සිසුන්ට බස් රථයෙන් බැසීමට බලකරන ආකාරයයි.
සිද්ධිය සම්බන්ධයෙන් අදහස් දක්වමින් ප්‍රවාහන අමාත්‍ය බිමල් රත්නායක අද පාර්ලිමේන්තුවට දැනුම්දුන්නේ, එම කොන්දොස්තරවරයා වහාම ක්‍රියාත්මක වන පරිදි සේවයෙන් ඉවත්කර ඇති බවයි.
සිද්ධිය සම්බන්ධයෙන් විමර්ශනය අවසන් වන තුරු කොන්දොස්තරවරයාට නැවත සේවයට එක්වීමට ඉඩ නොදෙන බව ඔහු සඳහන් කළා.
බස් කොන්දොස්තරවරයාට එරෙහිව දැනටමත් විනය ක්‍රියාමාර්ග ආරම්භ කර ඇති බවද අමාත්‍යවරයා වැඩිදුරටත් කියා සිටියා.
බස් වාර ප්‍රවේශපත්‍රයක් සහිත පාසල් සිසුන් සහ පුරවැසියන් මඟහරිමින් සේවා ක්‍රියාත්මක කරන ශ්‍රී ලංකා ගමනාගමන මණ්ඩල බස් රියදුරන්ට සහ කොන්දොස්තරවරුන්ට එරෙහිව පැමිණිලි ගොනුකළ හැකි බවට මෑතකදී තීරණය කර ඇති බව අමාත්‍ය බිමල් රත්නායක පෙන්වා දුන්නා.
ප්‍රවාහන, මහාමාර්ග, වරාය සහ සිවිල් ගුවන් සේවා පිළිබඳ අමාත්‍යාංශ උපදේශක කාරක සභාවේ මෑත රැස්වීමකදී අමාත්‍ය බිමල් රත්නායක පැවැසුවේ ඕනෑම පුරවැසියෙකුට 1958 අමතා එවැනි සිදුවීම් වාර්තා කළ හැකි බවයි.
