ජර්මනියේ පැවති ITB සංචාරක ප්‍රදර්ශනයේදී කීර්තිමත් හරිත ගමනාන්ත සඳහා වන ලෝකඩ සම්මානය සීගිරිය වෙනුවෙන් දිනා ගැනීමට ශ්‍රී ලංකාව සමත්ව තිබෙනවා.
විදේශ කටයුතු, විදේශ රැකියා සහ සංචාරක නියෝජ්‍ය අමාත්‍ය මහාචාර්ය රුවන් රණසිංහ මෙම ජයග්‍රහණය පිළිබඳව ප්‍රශංසා කරමින් පැවසුවේ එය තිරසාර සංචාරක ව්‍යාපාරය සඳහා ශ්‍රී ලංකාවේ නොසැලෙන කැපවීමට සාක්ෂියක් බවයි.
“ගෝලීය වශයෙන් පිළිගැනීමට ලක්ව ඇති සීගිරිය පර්වතයක් පමණක් නොව යුනෙස්කෝ ලෝක උරුම අඩවියක්. පොහොසත් සංස්කෘතික හා පුරාවිද්‍යාත්මක වටිනාකම සඳහා සීගිරිය අගය කෙරෙනවා. අවට වනාන්තර සහ වන අලි ඇතුන්ගේ පැවැත්ම සීගිරිය ශ්‍රී ලංකාවේ වඩාත් ප්‍රසිද්ධ සංචාරක ගමනාන්තයක් බවට පත් කරනවා,” යනුවෙන් ඔහු පවසා සිටියා.
“මෙම කීර්තිමත් සම්මානය අපගේ ජනතාවගේ කැපවීම ඉස්මතු කරනවා. අපගේ රට තවදුරටත් සංවර්ධනය කිරීමට සහ ලොව පුරා සංචාරකයන් අතර කීර්තිය වැඩි දියුණු කිරීමට මෙම සම්මානය විශාල අවස්ථාවන් විවෘත කරනවා. එවැනි පිළිගැනීමක් තුළින් අපට ශ්‍රී ලංකාවේ සුන්දරත්වය, ඉතිහාසය සහ තිරසාර භාවිතයන් පිළිබඳ වැඩි අවබෝධයක් ලබා දිය හැකියි,” යනුවෙන් සංචාරක නියෝජ්‍ය අමාත්‍යවරයා වැඩිදුරටත් පවසා සිටියා.
“මෙම ආඩම්බර මොහොත සමරන විට, වගකිවයුතු සහ පරිසර හිතකාමී සංචාර ප්‍රවර්ධනය කිරීම සඳහා අපගේ කැපවීම අපි නැවත තහවුරු කරනවා. දීප්තිමත් හා හරිත අනාගතයක් සහතික කරමින්, අපගේ ස්වාභාවික හා සංස්කෘතික උරුමයන් ආරක්ෂා කර ගැනීමට අපි එක්ව කටයුතු කරනවා,” යැයි මහාචාර්ය රණසිංහ පැවසුවා.
ශ්‍රී ලංකා සංචාරක ව්‍යාපාරය කෙරෙහි දක්වන අඛණ්ඩ සහයෝගය සහ විශ්වාසයට ඔහු ස්තූතිය පළ කර සිටියා.
