හලාවත කොළඹ ප්‍රධාන මාර්ගයේ මාරවිල මූදුකටුව ප්‍රදේශයේදී මෝටර් රථයක් ලොරියක ගැටීමෙන් හයදෙනෙකු තුවාල ලබා මාරවිල මූලික රෝහලට ඇතුළත් කර තිබෙනවා.
ඉන් බරපතළ තුවාල ලැබූ තිදෙනකු කොළඹ ජාතික රෝහල වෙත මාරු කර යවා ඇති බවයි වාර්තා වන්නේ.
ලොරිය පුත්තලම ප්‍රදේශයේ සිට බිත්තර රැගෙන කොළඹ දෙසට ගමන් කර ඇති අතර, මෝටර් රථය කොළඹ සිට හලාවත දෙසට ගමන් කර තිබෙනවා.
මෝටර් රථයේ ගමන් කළ පුද්ගලයන් මොරවිල තොඩුවාව ප්‍රදේශයේ පදිංචිකරුවන් වන අතර, ලොරියේ ගමන් කළ දෙදෙනා බේරුවල පදිංචිකරුවන් බව අනාවරණය වුණා.
මෙම අනතුරින් වාහනවලට ද දැඩි අලාභහානි සිදුව ඇති අතර ලොරියේ රුපියල් ලක්ෂ ගණනක බිත්තර තිබුණත් ඉතිරිව තිබුණේ බිත්තර දෙකක් පමණයි.
අනතුර සිදුවූ වහාම තුවාලකරුවන් සිටියදීම එම ස්ථානයට රැස්වූ ජනතාව බිත්තර රැගෙන ගිය බවද ප්‍රදේශවාසීහු සඳහන් කළා.
මාරවිල පොලිසිය වැඩිදුර පරීක්ෂණ සිදු කරනවා.
