ගනේමුල්ල සංජීව ඝාතනය සම්බන්ධයෙන් නවතම විමර්ශන වලින් අනාවරණය වී ඇති තොරතුරු අනුව, වෙඩිකරුවාගේ පෙම්වතිය ලෙස සැලකෙන 20 හැවිරිදි තරුෂි දෙවිමිණි නම් තරුණිය මහරගම ප්‍රදේශයේදී අත්අඩංගුවට ගෙන තිබෙනවා.
පොලිසිය සඳහන් කළේ, ඇය මහරගම සම්බාහන මධ්‍යස්ථානයක් අසලදී අත්අඩංගුවට ගත් බවත්, එම වෙඩිකරුවාගේ පාසල් මිතුරෙකු සහ තවත් සැකකරුවකුද මේ වන විට අත්අඩංගුවට ගෙන විමර්ශන ක්‍රියාත්මක කරමින් සිටින බවත් ය.
වෙඩිකරු ගනේමුල්ල සංජීව ඝාතනයෙන් පසු, තම පෙම්වතිය රැගෙන රටින් පිටවීමට සැලසුම් කර ඇති බවද අනාවරණය වී ඇති අතර, ඔවුන්ව මීගමුවට රැගෙන යාමට විශාල් තාරක නම් මිතුරෙකු මහරගමට පැමිණ තිබුණා. ඔහුද අත්අඩංගුවට පත්ව සිටින බව විමර්ශන වලින් හෙළි වී තිබෙනවා.
මෙහිදී විශේෂයෙන් අනාවරණය වූයේ, වෙඩිකරුවා සිය මිතුරන්ට “මට මොකක්හරි උනොත්, කෙල්ලව පරිස්සම් කරලා රට යවපන්” යනුවෙන් පවසා ඇති බවයි.
විමර්ශනවලදී අනාවරණය වී ඇත්තේ, ඝාතනය සිදු කිරීමට පෙර සැකකරු සහ ඔහුගේ පෙම්වතිය කොළඹ ප්‍රධාන මහේස්ත්‍රාත් අධිකරණ භූමියට කිහිප වරක් පැමිණ ඇති බවයි.
15 සිට 18 වැනිදා දක්වා දිවුලපිටිය ප්‍රදේශයේ ලැගුම්හලක රැඳී සිට ඇති බවද විමර්ශන වලට අනුව හෙළිවී තිබෙනවා.
ගනේමුල්ල සංජීව හා වෙඩික්කරුවා මීට පෙර එකඟතාවකින් කටයුතු කළ පිරිසක් බවත්, පසුව මත්ද්‍රව්‍ය ජාලයේ අභ්‍යන්තර ප්‍රශ්න හේතුවෙන් ඔවුන් අතර විරසකයක් ඇතිවී ඇති බවත් වාර්තා වනවා.
වෙඩිකරුවා මත්ද්‍රව්‍යවලට ඇබ්බැහිවීමෙන් පසුව, කෙහෙල්බද්දර පද්මේ නම් පාතාල නායකයාගේ බලය යටතට පත්ව ඇති බවද අනාවරණය වී තිබෙනවා.
සංජීව ඝාතනය, ඩුබායිහි සැඟව සිටින කෙහෙල්බද්දර පද්මේ විසින් ඔහුගේ පියා ඝාතනය කිරීමට පලිගැනීමක් ලෙස සූදානම් කළ ක්‍රියාවක් බවද ඉදිරි විමර්ශන වලින් පැහැදිලිවී තිබෙනවා.
දිනෙන් දින නවතම තොරතුරු අනාවරණය වන මෙම සිද්ධිය සම්බන්ධයෙන්, අත්අඩංගුවට ගත් සැකකරුවන් මෙන්ම තවමත් නිදහසේ සිටින පුද්ගලයින් සම්බන්ධයෙන්ද පොලීසිය දැඩි විමර්ශන වල නිරත වන බව පොලිස් ආරංචි මාර්ග තහවුරු කරනවා.
එමෙන්ම, මීගමුව පොලිසියේ කොස්තාපල්වරයා අදාළ සැකකාර යුවළට සහාය දැක්වූ බවට එල්ල වී ඇති චෝදනා හේතුවෙන්, ඔහු ලබන මාර්තු 07 දක්වා රක්ෂිත බන්ධනාගාර ගත කිරීමට කොළඹ ප්‍රධාන මහේස්ත්‍රාත් අධිකරණය නියෝග කළා.
