කෘෂිකර්ම අමාත්‍ය කේ.ඩී. ලාල් කාන්ත මහතා විසින් කරන ලද ප්‍රකාශයකට රජයේ වෛද්‍ය නිලධාරීන්ගේ සංගමය විරෝධය පළ කරනවා.
මෙවර අයවැය වැටුප් සංශෝධනය සම්බන්ධයෙන් වෛද්‍ය නිලධාරීන්ගේ සංගමය විසින් නිකුත් කර ඇති නිවේදනයකින් පසු ලාල්කාන්ත අමාත්‍යවරයා “අපිට වුවමනා අයට අපි වැඩියෙන් දෙනවා. අඩුවෙන් දෙන්න ඕන අය කවුද කියලා තීරණය කරන්නේ අපි. ඒ ගැන කතා කරන්න කාටවත් අයිතියක් නැ” ලෙස සදහන් කළා.
රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා පැවසුයේ ලාල් කාන්ත මහතාගේ මෙම ප්‍රකාශය ආණ්ඩුවේ නිල මතයදැයි වහාම ප්‍රකාශයක් කල යුතු බවයි.
ඇමතිවරයාගේ ප්‍රකාශයෙන් පැහැදිලි වන්නේ ‘ඉන්න බැරිනම් යන්න’ වැනි අදහසක් බවත් වෛද්‍යවරුන්ට රට හැරයා හැකි නමුත් එසේ ගිය දවසට රටේ රෝහල්, ශල්‍යාගාර, බාහිර රෝගී අංශ ආණ්ඩුවේ ඇමතිවරුන්ට බලා ගැනීමට සිදු වනු ඇති බවත් ඔහු කියා සිටියා.
විශේෂඥ වෛද්‍යවරුන්, වෛද්‍යවරුන් සෞඛ්‍ය වෘත්තිකයන් රට තුළ සිටිය යුතු බව මෙන්ම ඔවුන් වෙනුවෙන් සුදුසු පරිසරයක් රට තුළ නිර්මාණය කළ යුතු බව මාලිමා ආණ්ඩුවේ ප්‍රතිපත්තිය වුවත් ලාල් කාන්ත මහතාගේ ප්‍රකාශය එම ප්‍රතිපත්තියට පටහැනි බවත් ඔහු වැඩිදුරටත් කියා සිටියා.
