ගණේමුල්ල සංජීවගේ මරණය, පපුව, බෙල්ල සහ උදරය ඇතුළු ප්‍රදේශවලට සිදුවූ බහුවිධ තුවාලයන් හේතුවෙන් සිදුවූ බව, එය වෙඩිතැබීමක ප්‍රතිඵලයක් බව, කොළඹ ප්‍රධාන මහෙස්ත්‍රාත් තනූජා ලක්මාලි මහත්මිය අද (28) තීන්දු කළා.
දින දෙකක් පැවැති මහේස්ත්‍රාත් පරීක්ෂණයෙන් පසු, කොළඹ අපරාධ කොට්ඨාශය ඉදිරිපත් කළ පශ්චාත් මරණ පරීක්ෂණ වාර්තාව සහ පරීක්ෂණයේ නිරීක්ෂණ සලකා මෙම තීන්දුවට එළැඹුණු බවද ඇය සඳහන් කළා.
පරීක්ෂණයේදී, මියගිය සංජීව කුමාර සමරරත්නගේ සහෝදරිය වන දිල්රුක්ෂි සමරරත්න, සොයුරාගේ අවසන් මොහොතන්වල සිදුවීම් පිළිබඳව සාක්ෂි ලබා දී තිබෙනවා.
ඒ අනුව, අධිකරණය හමුවේ පෙනී සිටි නීතිඥවරුන් විසින්, සංජීව කුමාර සමරරත්නට වෙඩිතැබීමේ සිදුවීම පිළිබඳව සම්පූර්ණ විමර්ශනයක් සිදුකර, ආරක්ෂාව සඳහා යොදවා තිබූ නිලධාරීන්ගේ ක්‍රියාකාරීත්වය පරීක්ෂා කිරීමට අවධානය යෙදිය යුතු බව පෙන්වා දුන්නා.
සියලු කරුණු සලකා බැලූ මහෙස්ත්‍රාත්වරිය, මරණ සහතිකය නිකුත් කරන ලෙස නියෝග කළ අතර, නඩුව යළි මාර්තු 7 වනදා කැඳවීමටද නියෝග කළා.
