අද (02) පැවැත්වෙන තරගයේදී ක්‍රීඩකයන්ට මානසිකව ලබාදිය හැකි සහයෝගය උපරිමයෙන් ලබාදෙන ලෙස සනත් ජයසූරිය මහතා ක්‍රීඩාලෝලීන්ගෙන් ඉල්ලා සිටිනවා.
ශ්‍රී ලංකාව හා ඉන්දියාව අතර අද (02) ආරම්භ වන තරග 03කින් යුත් එක්දින තරගාවලිය පිළිබඳ ඊයේ (01) පැවැති ප්‍රවෘත්ති සාකච්ඡාවකදි ඔහු මේ බව අනාවරණය කළා.
ශ්‍රී ලංකා ක්‍රිකට් කණ්ඩායමේ වැඩබලන පුහුණුකරු ලෙසින් කටයුතු කරන සනත් ජයසූරිය මහතා වැඩිදුරටත් පවසා සිටියේ, මේ වනවිට ශ්‍රී ලංකා වේගපන්දු යවන්නන් 06 දෙනෙකු ආබාධවලට ලක්වී සිටින බවයි.
ඒ පිළිබඳව වැඩිදුරටත් අදහස් දැක්වූ සනත් ජයසූරිය,
“බිනුර ප්‍රනාන්දු, ඩිල්ෂාන් මධුසංක, දුෂ්මන්ත චමීර, මතීෂ පතිරණ, ළහිරු කුමාර, නුවන් තුෂාර මේ හය දෙනාම අබාධයට ලක්වෙලා ඉන්නේ. අපි 19 දෙනෙකු කණ්ඩායමට ඇතුළත් කළා.
ශ්‍රී ලංකා කණ්ඩායම ඇතුළේ උණක් තියෙනවා. මහීෂ් තීක්ෂණට උණ හැදිලා හිටියේ, වනිඳු හසරංගට මුලින් උණ හැදිලා හිටියා. බිනුර ප්‍රනාන්දුව අන්තිමට රෝහල්ගත කරන්නත් වුණා.
අවාසනාවන්ත දේවල් කිහිපයක් වුණා. ඒත් ඒවා අපේ නිදහසට කරුණු නෙමෙයි. මටත් හරි ලේසයි තාවකාලික පුහුණුකරු, මේ තරගාවලි දෙක විතරයි කියලා කියන්න.
මම එහෙම නෙමෙයි බලන්නේ. මමත් කවදාවත් පරාජය භාරගන්න කැමති කෙනෙක් නෙමෙයි. මමත් මේ තත්ත්යේ ඉදලා තියෙනවා මගේ අවුරුදු විස්සේ. අභියෝග භාරගන්න පුළුවන් වෙන්න ඕන හැමෝම. තාවකාලිකව තිබෙන දුකට තමයි මේ හැම දෙයක්ම කියන්නේ.”
තරග 03කින් සමන්විත ඉන්දු – ශ්‍රී ලංකා එක්දින තරගාවලිය ආරම්භ කරමින් පළමු තරගය කොළඹ ආර් ප්‍රේමදාස ක්‍රීඩාංගණයේදී අද දිනයේදී දිවා රාත්‍රී තරගයක් ලෙසින් පැවැත්වෙනවා.
