ක්ලබ් වසන්ත නොහොත් වසන්ත සුරේන්ද්‍ර පෙරේරා ඇතුළු දෙදෙනෙක් වෙඩි තබා ඝාතනය කිරීමේ සිදුවීම සම්බන්ධයෙන් මේවන විට පුද්ගලයින් 06ක් අත්අඩංගුවට ගෙන ඇති බවට වාර්තා වනවා.
එම අත්අඩංගුවට ගත් පිරිස අතර අදාළ සිදුවීම සිදුවූ ව්‍යාපාරික ස්ථානයේ හිමිකරුද සිටින බවටයි පැවසෙන්නේ.
ඊට අමතරව වෙඩික්කරුවන්ට ප්‍රවාහන පහසුකම් ලබාදුන් පුද්ගලයන්ද ඒ අතර සිටින බව පොලීසිය සඳහන් කළා.
මේ අතර මියගිය සුරේන්ද්‍ර වසන්ත පෙරේරාගේ බිරිඳ වැඩිදුර ප්‍රතිකාර සඳහා හෝමාගම මූලික රෝහලෙන් කළුබෝවිල රෝහලට මාරු කර යවා තිබෙනවා.
මැණික් විජේවර්ධන (42) නැමැති එම කාන්තාව ශල්‍යකර්මයක් සඳහා යොමු කොට දැඩි සත්කාර ඒකකයේ ප්‍රතිකාර ලබමින් සිටියදී ඇයගේ තත්වය අසාධ්‍ය බැවින් කළුබෝවිල් ශික්ෂණ රෝහලට මාරු කර යවා ඇති බවයි හෝමාගම මූලික රෝහල් ආරංචි මාර්ග සඳහන් කළේ.
මෙම වෙඩි තැබීම පිළිබඳව විමර්ශනය කිරීම සඳහා විශේෂ පොලිස් කණ්ඩායම් 10ක් ද පත් කර තිබෙනවා.
