නැෂනල් වර්ක්ස් ඉන්ස්ටිටියුට් සතු දෙමහල් ගොඩනැගිල්ලක් සහිත ඉඩමක් ව්‍යාජ ඔප්පුවක් සකස් කර රුපියල් ලක්ෂ 36කට බදු දී වංචාවක් සිදුකර ඇති බවට චෝදනා වන සිද්ධියකට අදාළව, අගතියට පත් පාර්ශවය වෙනුවෙන් ලිඛිත දේශන ගොනු කිරීම සඳහා ගල්කිස්ස මහේස්ත්‍රාත්වරිය පෙබරවාරි 21 වන දින නියෝග ලබාදී තිබෙනවා.
ඒ අනුව, ලබන මාර්තු 07 වනදා අදාළ ලිඛිත දේශන අධිකරණයට ඉදිරිපත් කිරීමට නියමිතව තිබෙනවා.
අදාළ නඩුවේ සැකකරුවන් අත්අඩංගුවට ගැනීම සඳහා පෙරවරුවේද නියෝග ලබාදී තිබුණද, එය ක්‍රියාත්මක නොවූ බවත්, නීතිපති උපදෙස් සඳහා පොලිසිය ඉල්ලීමක් කළ බවත්, අගතියට පත් පාර්ශවය නියෝජනය කළ ජනාධිපති නීතීඥ මෛත්‍රී ගුණරත්න මහතා අධිකරණයට දැනුම්දී ඇත.
බී වාර්තාව අනුව, 2017 සැප්තැම්බර් 3 වනදා නැෂනල් වර්කස් කොංග්‍රස් වෘත්තීය සමිතියේ සභාපති ලෙස පත් වූ බව වසන්ත සමරසිංහ පවසා ඇති අතර, කම්කරු දෙපාර්තමේන්තුවේ වාර්තාව අනුව 2024 දක්වාම සභාපති මයුරා ධර්මවර්ධන බව සඳහන් වී තිබෙනවා.
2020 පෙබරවාරි 10 දින, අදාළ දේපළ අංක 166, 206, 207 සඳහා වසන්ත සමරසිංහ සහ රන්කොත්ගෙදර සිරිල් ආනන්දසිරි යන පුද්ගලයින්ගේ අත්සනින් බදු ඔප්පු නිකුත් කර ඇති බව ද එම වාර්තාවෙන් අනාවරණය වනවා.
සැකකරුවන් අත්අඩංගුවට ගැනීමට ප්‍රමාණවත් සාක්ෂි තිබියදීත්, මෙතෙක් විමර්ශන වලින් නිශ්චිත සාක්ෂි අනාවරණය වී නොමැති බව වංචා විමර්ශන කාර්යංශය පවසා ඇත. කඩුවෙල දිසා අධිකරණයේ පවතින වෙනම නඩුකරයක් සැලකිල්ලට ගනිමින්, නීති උපදෙස් ලබා ගැනීමට කටයුතු කර ඇති බවද සඳහන් වනවා.
අදාළ නඩුව නැවත විභාගයට ගැනීමට මාර්තු 07 වනදා අධිකරණය නියම කර තිබෙනවා.
