ශ්‍රී ලංකාව මෙන්ම ලෝකයම කාන්තාවන්ගේ ජයග්‍රහණ සහ දායකත්වය ගරු කරමින් ජාත්‍යන්තර කාන්තා දිනය සමරද්දී, කීර්තිමත් ඔලිම්පික් බොක්සිං විනිසුරු සහ ප්‍රධාන පොලිස් පරීක්ෂක නෙල්කා ශිරෝමාලාට එරෙහිව එල්ල කරන මඩ ගැසීමේ ව්‍යාපාරයක් ක්‍රියාත්මක වී තිබෙනවා.
ශ්‍රී ලංකා බොක්සිං සංගමය (BASL) සභාපති අනුරුද්ධ ශානක බණ්ඩාරගේ නායකත්වයෙන්, ඔහුට සමීප නිලධාරීන් සහ ජනප්‍රිය ඉරිදා පුවත්පතක සහයෝගයෙන්, ජාත්‍යන්තර ක්‍රීඩා වේදිකාවේ ශ්‍රී ලංකාව නියෝජනය කළ ක්‍රීඩිකාවන්ට වඩා විනිසුරු සහ තීරකවරියක් ලෙස රටට වඩාත්ම කීර්තිමත් පිළිගැනීමක් ලබාදුන් නෙල්කා ශිරෝමාලාට අනවශ්‍ය ප්‍රහාරයක් එල්ල කර තිබෙනවා.
2024 පැරිස් ඔලිම්පික් ක්‍රීඩා උළෙලේ හොඳම විනිසුරු සහ තීරකවරියක් ලෙස පිළිගත් ශිරෝමාලා, යම් නිලධාරීන්ගේ ද්වේෂ සහ දේශපාලනික අරමුණු වලට පාත්‍ර වී ඇත.
අසාධාරණ චෝදනා එල්ල වූ ගෞරවනීය ජාත්‍යන්තර නිලධාරිනිය
දෙවරක් ඔලිම්පික් තීරකවරියක් වූ නෙල්කා ශිරෝමාලා, ඇයගේ කීර්තියට හානි කරන පදනම් රහිත හා ඉලක්කගත මඩ ගැසීමකට මුහුණ දී තිබෙනවා. මෙම අවිශ්වාසනීය චෝදනාව සම්බන්ධයෙන් ඇතිවූ විවේචනයෙන් පසුව, ඇයගේ නම මෙම උත්සාහයන්ගෙන් ඉවත් කරන බවට පොරොන්දුවී ඇත.
“ජාත්‍යන්තර බොක්සිං සංගමය (IBA) විසින් මාව කිසිවිටෙකත් නිල වශයෙන් අත්හිටුවා නැත. නමුත් මගේ කීර්තියට හානියක් සිදු කිරීමට වැරදි තොරතුරු හිතාමතාම පතුරුවා තිබෙනවා. මෙය මට අපකීර්තියක් එල්ල කර, මාව දුර්වල කිරීමට කළ සංවිධානාත්මක උත්සාහයකි,” යැයි ශිරෝමාලා සඳහන් කළා.
ජාත්‍යන්තර ඔලිම්පික් කමිටුව (IOC) විසින් දැනටමත් තාවකාලිකව පිළිගෙන ඇති World Boxing (WB) නම් ප්‍රතිවාදී සංවිධානයට ඇය ඇතුළත්වීම, ඇයව ඉලක්කගත් ප්‍රධාන හේතුවක් ලෙස දක්වන්නට පුළුවන්. IOC විසින් IBA තහනම් කිරීමෙන් පසු, ශ්‍රී ලංකා ජාතික ඔලිම්පික් කමිටුව (NOCSL) IBA සමඟ BASL එකට වෙන්වී සිටීම හේතුවෙන්, එහි සාමාජිකත්වය අවලංගු කර තිබෙනවා.
මෙය ලෝක බොක්සිං ක්‍රීඩාවේ විශ්වාසනීයත්වය තවදුරටත් ඉහළ නැංවීමක් බවට පත්වුණා. ඒ වෙනුවෙන් ඇමරිකාව, ඕස්ට්‍රේලියාව, ජර්මනිය, ප්‍රංශය ඇතුළු රටවල් 84ක් ම සෘජුව සහාය ලබාදී තිබෙනවා. මෙය ලෝක බොක්සිං සංවිධානයේ ජාත්‍යන්තර පිළිගැනීම ශක්තිමත් කළා.
“ඔලිම්පික් නිලධාරිනියක් ලෙස මගේ තත්ත්වය කිසිඳු සැලසුමකින් හෝ ොබලපෑම් වලින් තොරව පවතින අතර, මා පිළිබඳව පැතිරෙන අසත්‍ය ප්‍රචාර මට කිසිඳු බලපෑමක් සිදු කරන්නේ නැහැ” යනුවෙන් ශිරෝමාලා තහවුරු කළා.
මෙසේ තිබියදීත්, ශ්‍රී ලංකා බොක්සිං සංගමය (BASL) විසින් ඇයව පැත්තකට දැමීමේ උත්සාහය, ශ්‍රී ලංකාවේ ක්‍රීඩක ක්‍රීඩිකාවන්ට ජාත්‍යන්තර මට්ටමේ තරඟ සඳහා එකම පිවිසුම් මාර්ගය වන World Boxing සමග එක්වීම වැළැක්වීමේ උත්සාහයක් ලෙස සැලකිය හැකියි.
නෙල්කා ශිරෝමාලා, ශ්‍රී ලංකාවේ බොක්සිං ක්‍රීඩාව සඳහා විශාල සේවයක් කළ, ජාත්‍යන්තර වේදිකාවේ, ශ්‍රී ලංකාව ගෞරවයෙන් නියෝජනය කළ, ඉතාමත්ම කීර්තිමත් හා ගෞරවනීය කාන්තා නිලධාරිනියක්.
අසත්‍ය චෝදනා පිටුපස සැබෑ තත්ත්වය
2024 ඔක්තෝබර් 25 සිට නොවැම්බර් 3 දක්වා කොලරාඩෝ හි පැවති U-19 ලෝක බොක්සිං ශූරතාවලියේදී, IBA නියමයන් උල්ලංඝනය කළ බවට චෝදනා කරමින්, බොක්සිං ස්වාධීන අඛණ්ඩතා ඒකකය (BIIU) ශිරෝමාලාට වසර 2ක අත්හිටුවීමක් යෝජනා කර තිබෙනවා. ඔවුන්ගේ චෝදනාව වූයේ, ඇය ප්‍රමාදයකින් තොරව අවශ්‍ය අනුමැතිය ලබාගෙන නොතිබුණු බවයි.
කෙසේවෙතත්, ශිරෝමාලා මෙම චෝදනා සම්පූර්ණයෙන්ම ප්‍රතික්ෂේප කරමින් පවසා ඇත්තේ, තමන් BASL සභාපතිවරයාගෙන් අවසර ඉල්ලා ඇති අතර, ක්‍රීඩා අමාත්‍යාංශයේ මඟපෙන්වීම් අනූව සියලුම නිල ක්‍රියාමාර්ග අනුගමනය කර ඇති බවයි.
“මා කිසිදු නීති උල්ලංඝනයක් සිදු කළේ නැහැ. නීතිය ක්‍රියාත්මක කරන පුද්ගලයෙකු ලෙස, නිසි ක්‍රියාමාර්ග අනුගමනය කිරීමේ වැදගත්කම මට අවබෝධයක් තියෙනවා” යැයි ඇය ප්‍රකාශ කළා.
මෙම සිදුවීමේ තවත් විශේෂ දෙයක් වූයේ, රහසිගත විනිශ්චය සභා ලිපියක් WhatsApp සහ මාධ්‍ය ඔස්සේ සංසරණය වී, වැරදි ලෙස නිරූපණය වීමයි. එම ලිපිය BASL විධායක කමිටුව තුළ විමර්ශනය සඳහා යොමු කළද, එය සංසරණය කිරීමේ අරමුණ ශිරෝමාලා දැනටමත් අත්හිටුවා ඇති බවට වැරදි අවබෝධයක් සමාජගත කිරීමට බව ඇය පෙන්වාදී තිබෙනවා.
“මෙම ලිපිය රහසිගතව තබා ගැනීමට නියමිතව තිබුණද, එය හිතාමතාම මහජනතාව නොමඟ යැවීමටත්, මා දැනටමත් අත්හිටුවා ඇති බව පැවසීමටත් සංසරණය කර තිබෙනවා” යනුවෙන් ශිරෝමාලා අවධාරණය කළා.
ශ්‍රී ලංකාවේ බොක්සිං අනාගතය අවදානමේ
මෙම සටනේදී ශිරෝමාලාව තනිවම නොවේ. BIIU විසින් විමර්ශනය කරන ලද මහාද්වීප පහකින් පැමිණි ජාත්‍යන්තර ඔලිම්පික් විනිසුරුවන් 36 දෙනාගෙන් ඇය එක් අයකේ, නමුත් මෙය අපකීර්තියක් බවට පත්ව ඇති එකම රට ශ්‍රී ලංකාවයි.
“ලෝක බොක්සිං අපි සියලු දෙනාටම එක්සත් ආයතනයක් ලෙස පෙනී සිටිනවා. මෙය ගෝලීය පරිමාණයෙන් බොහෝ නිලධාරීන්ට බලපාන පුළුල් ගැටළුවක් බැවින් මම තනි තනිව ප්‍රතිචාර නොදැක්වීමට තීරණය කළෙමි,” ඇය පැහැදිලි කළා.
IBA ඔලිම්පික් තරඟයෙන් තහනම් කර ඇති බැවින්, ශ්‍රී ලංකාව එහි ක්‍රීඩක ක්‍රීඩිකාවන් ජාත්‍යන්තරව තරඟ කිරීමට නම් ලෝක බොක්සිං සමඟ පෙළගැසිය යුතුයි.
“IBA තවදුරටත් IOC විසින් පිළිගන්නේ නැහැ. නමුත් ලෝක බොක්සිං නිල පිළිගැනීමක් ලබා තිබෙනවා. අපගේ ක්‍රීඩක ක්‍රීඩිකාවන්ට 2028 ලොස් ඇන්ජලීස් ඔලිම්පික් උළෙලට තරඟ කිරීමට අවස්ථාව ලැබිය යුතු අතර, ක්‍රීඩාවේ අනාගතය සඳහා සැබවින්ම කටයුතු කරන නිලධාරීන් ඉලක්ක කර ගැනීමට වඩා ඔවුන් සඳහා මාර්ග නිර්මාණය කිරීමට BASL ප්‍රමුඛත්වය දිය යුතුයි. එපමණක් නොව, යොවුන් ඔලිම්පික් ක්‍රීඩා, පොදුරාජ්‍ය මණ්ඩලීය ක්‍රීඩා සහ හමුදා ක්‍රීඩා ආදියට සහභාගී වීම සඳහා ලෝක බොක්සිං සමග අනුබද්ධ වීම ද අදාළ වනවා” ශිරෝමාලා අවධාරණය කළා.
ඇගේ අවසන් නඩු විභාගය අප්‍රේල් 15 වන දින ජිනීවාහිදී පැවැත්වීමට නියමිත අතර, එහිදී නීති නියෝජිතයින් සහ ලෝක බොක්සිං නිලධාරීන් ඇගේ නඩුව වෙනුවෙන් පෙනී සිටිනු ලබනවා.
ඒ සමඟම, ඇයට එරෙහිව එල්ල වී ඇති මඩ ගැසීමේ ව්‍යාපාරය සම්බන්ධයෙන් ක්‍රීඩා අමාත්‍යවරයාගෙන් නිල පරීක්ෂණයක් ඉල්ලා ශ්‍රී ලංකාවේ ක්‍රීඩා නීතිය සහ රෙගුලාසි යටතේ නීතිමය ක්‍රියාමාර්ග ගැනීමට ඇය පොරොන්දු වී තිබෙනවා.
ඊට අමතරව, හිතාමතාම අසත්‍ය තොරතුරු සංසරණය කිරීම විමර්ශනය කිරීම සඳහා පොලිස් මාධ්‍ය ඒකකය සහ CID හි සයිබර් අපරාධ ඒකකය සම්බන්ධ කර ගැනීමට ඇය අදහස් කරනවා.
කාන්තා දිනයට එල්ල වූ නින්දිත ප්‍රහාරයක්
ජාත්‍යන්තර කාන්තා දිනයේදී ශ්‍රී ලංකාවේ ප්‍රසිද්ධම කාන්තා ක්‍රීඩා නිලධාරිනියකට එල්ල වූ මෙම ප්‍රහාරය ක්‍රීඩා ක්ෂේත්‍රයේ බොහෝ දෙනා විසින් දැඩි ලෙස හෙළා දකිමින් තිබෙනවා. ලෝකය සන්සුන්ව කාන්තා ජයග්‍රහණ සැමරූ අතර, ශ්‍රී ලංකා බොක්සිං සංගමය සහ එහි බලවතුන් විසින්, ශ්‍රී ලංකාවේ බොක්සිං ක්ෂේත්‍රයට සුවිශේෂී ගෞරවයක් ගෙන ආ කාන්තාවකට විරුද්ධව අසාධාරණ ව්‍යාපාරයක් ආරම්භ කර තිබෙනවා.
BASL විවිධත්ව (Diversity) සභාපතිනිය ලෙස, ශිරෝමාලා දීර්ඝ කාලයක් තිස්සේ සාධාරණ ක්‍රීඩා පද්ධතියක් හා ක්‍රීඩක ක්‍රීඩිකාවන්ගේ සංවර්ධනය සඳහා කැප වී ඇති කාන්තාවක්. එහෙත්, ඇයට අපකීර්තියක් පැවරීමට කරන මෙම නිරන්තර උත්සාහය, ඇයව බොක්සිං ක්ෂේත්‍රයේ පාලනයෙන් ඉවත් කිරීමේ හා වෙනසක් සඳහා කැපවෙන අය නිහඬ කිරීමේ වැඩසටහනක කොටසක් ලෙස පෙනී තිබෙනවා.
එහෙත්, 2028 ඔලිම්පික් උළෙලේ තාක්ෂණික නිලධාරිනියක් ලෙස කටයුතු කිරීමේ සහ ශ්‍රී ලංකා ක්‍රීඩක ක්‍රීඩිකාවන් ලෝක වේදිකාවේ තරඟ කිරීමේ අවස්ථා ලබාදීමේ උත්සාහයේ ශිරෝමාලා තවදුරටත් නියමිත මග පරිපාලනය කරමින් සිටිනවා.
“මෙම සැලසුම්ගත ප්‍රහාරය නිවැරදි දේ සඳහා වන මගේ කැපවීම වෙනස් කිරීමට හැකි වන්නේ නැහැ. ජාත්‍යන්තර බොක්සිං ක්‍රීඩාවේ ශ්‍රී ලංකාවට හිමි ස්ථානය සහතික කිරීම සඳහා මම අධිෂ්ඨානශීලීව සිටිමි,” යැයි ඇය ප්‍රකාශ කළා.
ශ්‍රී ලංකා රජය සහ ක්‍රීඩා බලධාරීන් දැන් කඩිනමින් ක්‍රියා කළ යුතු වන්නේ, ශ්‍රී ලංකාවේ ක්‍රීඩක ක්‍රීඩිකාවන් මිතුරන් කිහිප දෙනෙකුගේ පටු දේශපාලන ක්‍රියා මත පීඩාවට පත්වීම වැලැක්වීමයි.
තීරණය පැහැදිලිය – ශ්‍රී ලංකාවට ලෝක බොක්සිං ක්‍රීඩාවේ ස්ථානය තහවුරු කරගැනීමක් අවශ්‍යද, නැතහොත් ජාත්‍යන්තර තරඟ වලින් ඉවත් වීමටද යන්න තීරණය කළ යුතුය.ර
