ලොව ප්‍රකට පණිවුඩ හුවමාරු සමාජ මාධ්‍යක් වන ටෙලිග්‍රෑම් මෙවලමෙහි නිර්මාතෘ මෙන්ම එහි ප්‍රධාන විධායක නිලධාරියා ලෙස කටයුතු කරන පවෙල් දුරෝව් ට එරෙහිව මේ වනවිට ප්‍රංශ බලධාරීන් පරීක්ෂණයක් ආරම්භ කර තිබෙනවා.
39 හැවිරිදි දුරෝව් ප්‍රංශ පුරවැසිභාවය හිමි පුද්ගලයෙක්.
ඔහු ට එරෙහිව චෝදනා එල්ල වී ඇත්තේ ටෙලිග්‍රෑම් මෙවලම හරහා සංවිධානාත්මක අපරාධ සිදුකෙරෙන බවට චෝදනා කරමින්.
ඔහු රක්ෂිත බන්ධනාගාර කර නොමැති වුවද ඔහු අධිකරණ අධීක්ෂණය යටතේ පසුවනවා.
එසේම ඩොලර් මිලියන 5.6ක ඇපයක් තැබීමට ද ඔහුට සිදුවී තිබෙනවා.
දුරෝව් සති දෙකකට වරක් පොලිස් ස්ථානයට වාර්තාකළ යුතු අතර එසේම ඔහුට ප්‍රංශ භූමියෙන් පිටතට යාම ද තහනම් වී තිබෙනවා.
මේ අතර අද ජාත්‍යන්තර මාධ්‍ය වාර්තාකර ඇත්තේ ටෙලිග්‍රෑම් CEO සමග ප්‍රංශයට පැමිණි 24 හැවිරිදි ජූලි වැවිලෝවා නම් කාන්තාව අතුරුදන්ව ඇති බවයි.
එම මාධ්‍ය වාර්තා සඳහන් කරන්නේ ටෙලිග්‍රෑම් ප්‍රධානියා ව ප්‍රංශය ට රැගෙන එම ට මෙම කාන්තාව සම්බන්ධ බවට සැකයක් මතුව ඇති බවයි.
ක්‍රිප්ටෝ පුහුණුකාරිනියක් මෙන්ම වීඩියෝ ක්‍රීඩා ස්ට්‍රීමර් කෙනෙක් විදියට ප්‍රචලිත ඇය ගේ අතුරුදන්වීම සම්බන්ධයෙන් ඇයගේ ඥාතීන් කලබලයට පත්වී සිටින බව සඳහන්.
ප්‍රංශය ට පැමිණීමට පෙර පවෙල් දුරෝව් අසර්බයිජානයේ සිට ඇති අතර මෙම කාන්තාව ද ඔහු සමග එහි සිටි බව වාර්තා වනවා.
මාධ්‍ය වාර්තා සඳහන් කරන්නේ පවෙල් දුරෝව් සමග සිටින අවස්ථා දැක්වෙන ඡායාරූප එම කාන්තාව සිය සමාජ මාධ්‍ය ගිණුම්වල වාර්තාකර තිබීම ටෙලිග්‍රෑම් ප්‍රධානියාව අත්අඩංගුවට ගැනීම පහසුකර තිබු බවයි.
රුසියානු ජාතිකයෙක් වන පවෙල් දුරෝව් 2014 සිට ඩුබායි හි වාසය කරනවා.
එම කාන්තාව ද ඩුබායි හි ජීවත් වන අතර ජාත්‍යන්තර මාධ්‍ය සඳහන් කරන්නේ පවෙල් දුරෝව් ව කොටුකර ගැනීම සඳහා උගුලක් ලෙස භාවිත කර ඇති බවයි.
